اے کے آر ایس پی کے زیر اہتمام دوروزہ تربیتی ورکشاپ کا انعقاد

اشتہارات

چترال(محکم الدین)آغاخان دیہی ترقیاتی پروگرام کے زیر انتظام ایس ایم کے پراجیکٹ کے تحت اے ایف سی ایڈوائزری کمیٹی کی ذمہ داریوں سے متعلق دو روزہ ورکشاپ ایک مقامی ہوٹل میں منعقد ہوا جس میں دروش، ایون، تریچ، ارکاری، شغور، کریم آباد، موڑکہو، تورکہو، لاسپور، کوہ،چرون، کوشٹ، مستوج، لوٹ اویر اورگرم چشمہ کے ایل ایس اوز سے تعلق رکھنے والے اے ایف سی کمیٹی کے ممبران اورمنٹرز نے شرکت کی۔ ریجنل کوآرڈنیٹر ایس ایم کے پراجیکٹ اے کے آر ایس پی چترال شمیم اختر نے کہا کہ اس پراجیکٹ کے تحت 9سے 13سال، 14سے 16 سال اور 17سے 19 سال کے بچوں کیلئے ایڈولینس فیملی سنٹرز قائم کئے گئے ہیں جس میں میل اورفمیل بچوں کو علیحدہ علیحدہ تربیت فراہم کی جائے گی۔ انہوں نے کہا کہ سنٹرز کو تمام جد ید سہولیات سے آراستہ کیا گیا ہے جس میں بچے انٹرنیٹ کے ذریعے تعلیمی سہولیات بھی حاصل کر سکتے ہیں۔ کنسلٹنٹ ٹرینر ساجدہ شاہ نے سنٹر کی مزید افادیت بتاتے ہوئے کہاکہ یہ سنٹر تولیدی صحت کے حوالے سے آگہی پھیلانے کیلئے بھی بہت مفید ثابت ہوگی کیونکہ تولیدی صحت کے بغیر صحتمند خاندان تشکیل نہیں پا سکتا اوریہ تب ہی ممکن ہے جب مائیں اورنومولودبچے صحتمند ہوں۔ اس لئے یہ ضروری ہے کہ جہاں ہم روزانہ کے تما م ضرورتوں کیلئے منصوبہ بندی کرتے ہیں وہاں دنیا میں آنے والے بچوں اور ان کی ماوں کی صحت کے بار ے میں بھی سوچیں کیونکہ تولیدی صحت پر توجہ نہ دینے کی وجہ سے ہماری آمدنی کا بڑا حصہ کمزور اور بیمار ماؤں اور بچوں کے علاج معالجے اور ادویات پر خرچ ہوتے ہیں۔
ایڈوائزری کمیٹی کے ممبران نے سنٹرز کے قیام کو انتہائی سودمند قرار دیا اور کہا کہ سنٹرز سے بچوں کی صلاحیتوں کو اجاگر کرنے، تخلیقی سوچ کو فروغ دینے، جدید ٹیکنالوجی سے استفادہ کرنے کے مواقع مہیا کرنے، اور انہیں منفی سرگرمیوں سے بچانے میں مدد ملے گی۔ ورکشاپ میں اس حوالے سے گروپ ورک بھی کئے گئے۔