119

عید الفطر کے موقع پرچترال پولیس کی کم عمر موٹر سائیکل سواروں کے خلاف کارروائی،بڑی تعداد میں موٹر سائیکلیں بند کی گئیں

چترال(بشیر حسین آزاد) عید الفطر کے موقع پر ڈی پی او لوئر چترال ثونیہ شمروز خان کی خصوصی ہدایات پر ڈی ایس پی سرکل محمد یعقوب،ایس ایچ او تھانہ چترال سجاد حسین اور ٹریفک وارڈن شاہ فیصل نے جگہ جگہ ناکہ لگاکر کم عمر ڈرائیوروں،کم عمر موٹر سائیکل سواروں اور ون ویلنگ کرنے والوں کے خلاف کامیاب آپریشن کرکے لوگوں کو حادثات سے بچایا اور کسی بھی جگہ سے ناخوشگوار واقعے کی کوئی اطلاع نہیں ملی۔چترال کے عوامی حلقوں نے اس طرح کی کامیاب حکمت عملی پر ڈی پی او لوئر چترال ثونیہ شمروز خان،ڈی ایس پی سرکل محمد یعقوب،ایس ایچ او تھانہ چترال سجاد حسین اور ٹریفک وارڈن شاہ فیصل کو خراج تحسین پیش کیا ہے۔


عوام کے نام ایک پیغام میں ڈی پی او لوئر چترال محترمہ ثونیہ شمروز خان نے کہا ہے کہ نوعمر اولاد کو حادثات سے بچانا والدین کی ذمہ داری ہے اگر والدین نے اپنی ذمہ داری کا احساس کرکے نابالغ اولاد کو موٹر سائیکل سے دور رکھیں تو افسوس ناک حادثات کی روک تھام میں مدد ملے گی۔
قانونی ماہرین کا کہنا ہے کہ کم عمر ڈرائیورں کے ساتھ ان کے خاندان کے سربراہ،باپ،دادا،چچا یا بڑے بھائی اور ماموں کے خلاف پرچہ کرنے کے لئے قانون کا مسودہ تیار کیاجارہا ہے۔قانون منظور ہونے کے بعد کم عمر ڈرائیوروں کے کنبے کے سربراہ کو گرفتار کرنے کی راہ ہموار ہوجائیگی۔


درین اثنا ایس ایچ چترال تھانہ سجاد حسین نے چترال کے عوام سے اپیل کی ہے کہ نوعمر ڈرائیوروں،بائیک سواروں اور ون ویلنگ کرنے والوں کے خلاف پولیس کی کامیاب کارروائی کو جاری رکھنے کے لئے چترال پولیس اور ٹریفک پولیس کو عوام کا بھرپور تعاؤن حاصل ہونا چاہیئے۔اس سلسلے میں والدین ذمہ داری کا مظاہرہ کرتے ہوئے اپنے کمسن بچوں کو موٹر سائیکل چلانے سے باز رکھے بصورت دیگر ان کے خلاف سخت قانونی کاروائی کی جائیگی۔