خیبر پختونخوا میں گورنر راج کے حوالے سے مشاورت ہوئی ہے، فیصل کریم کنڈی
پشاور: (ویب ڈیسک) گورنر خیبر پختونخوا فیصل کریم کنڈی نے کہا ہے کہ صوبے میں گورنر راج کے نفاذ کیلئے مشاورت ہوئی ہے۔
پشاور میں میڈیا سے گفتگو کرتے ہوئے فیصل کریم کنڈی نے کہا کہ گورنر راج کا امکان موجود ہے اور آئین میں اس کی گنجائش بھی ہے، صوبے میں امن و امان، لاقانونیت اور دہشت گردی سمیت مختلف مسائل موجود ہیں، جنہیں دیکھتے ہوئے اس معاملے پر مشاورت کی گئی ہے۔
پی ٹی آئی کے مجوزہ لانگ مارچ کے حوالے سے گورنر خیبر پختونخوا نے کہا کہ تحریک انصاف کی جانب سے مارچ کے لیے واضح تیاری نظر نہیں آرہی۔
انہوں نے دعویٰ کیا کہ پارٹی کے بعض ارکان گرفتاریاں دے رہے ہیں اور انہیں توقع ہے کہ پی ٹی آئی آج یا کل لانگ مارچ ختم کرنے کا اعلان کردے گی۔
فیصل کریم کنڈی نے صوبائی حکومت کی جانب سے پولیس سے متعلق مجوزہ قانون پر بھی اعتراضات اٹھائے۔ ان کا کہنا تھا کہ صوبائی حکومت پولیس کے نظام پر زیادہ اختیار چاہتی ہے اور آئی جی، ڈی آئی جیز اور ڈی پی اوز کی تقرریوں سے متعلق اختیارات حاصل کرنا چاہتی ہے۔
گورنر خیبر پختونخوا نے کہا کہ وہ ایسے اقدام کے خلاف کھڑے ہوں گے، صوبے کی موجودہ صورتحال میں امن و امان کو اہم مسئلہ قرار دیتے ہوئے اپنی تشویش کا اظہار کیا۔
واضح رہے کہ گورنر راج کے معاملے پر وفاقی حکومت کی جانب سے رواں ہفتے مختلف قانونی امکانات پر مشاورت کی اطلاعات سامنے آئی تھیں، تاہم وفاقی وزیر اطلاعات نے کہا تھا کہ حکومت کا فی الحال گورنر راج نافذ کرنے کا منصوبہ نہیں۔