ایم این اے عبد اللطیف کی رہائی کیلئے پاکستان تحریک انصاف کا دروش میں احتجاجی ریلی
چترال (بشیرحسین آزاد)دروش میں پاکستان تحریک انصاف کے زیر اہتمام رکن قومی اسمبلی عبد اللطیف کی رہائی کے سلسلے میں ایک پرامن اور پر ہجوم احتجاجی ریلی نکالی گئی۔
ریلی کی قیادت پاکستان تحریک انصاف ضلع لوئر چترال کے جنرل سیکرٹری سید فرید جان نے کی، جبکہ اس میں مختلف علاقوں سے تعلق رکھنے والے پارٹی کارکنان، بزرگوں، نوجوانوں، سماجی شخصیات اور شہریوں کی بڑی تعداد نے شرکت کی۔
شرکاء نے ہاتھوں میں بینرز اور پلے کارڈز اٹھا رکھے تھے جن پر عبد اللطیف کی رہائی اور انصاف کی فراہمی کے حق میں نعرے درج تھے۔
ریلی سے خطاب کرتے ہوئے مقررین نے کہا کہ ہر شہری کو آئین اور قانون کے مطابق انصاف فراہم کیا جانا چاہیے۔ انہوں نے مطالبہ کیا کہ رکن قومی اسمبلی عبد اللطیف کو فوری طور پر رہا کیا جائے اور ان کے ساتھ قانون کے مطابق منصفانہ سلوک یقینی بنایا جائے۔
مقررین نے اس بات پر زور دیا کہ جمہوری نظام میں اختلاف رائے کو برداشت کرنا اور سیاسی کارکنوں کے آئینی و قانونی حقوق کا تحفظ ریاست کی ذمہ داری ہے۔
انہوں نے مزید کہا کہ پاکستان تحریک انصاف اپنے کارکنوں اور منتخب نمائندوں کے حقوق کے تحفظ کے لیے آئینی اور جمہوری جدوجہد جاری رکھے گی۔ مقررین نے کارکنوں پر زور دیا کہ وہ ہر مرحلے پر امن، اتحاد اور نظم و ضبط کو برقرار رکھیں اور کسی بھی غیر قانونی سرگرمی سے گریز کریں۔
احتجاجی ریلی کے دوران شرکاء نے قانون کی بالادستی، انصاف کی فراہمی اور جمہوری اقدار کے فروغ کے حق میں نعرے بھی لگائے۔ ریلی پُرامن طور پر اختتام پذیر ہوئی، جبکہ شرکاء نے اس عزم کا اظہار کیا کہ اگر ان کے مطالبات پر توجہ نہ دی گئی تو آئندہ کے لائحہ عمل کا اعلان پارٹی قیادت کی مشاورت سے کیا جائے گا۔