امریکہ میں مقیم ممتاز کاروباری شخصیت روزیمان شاہ کا اہلیہ کے ہمراہ حمیدہ ایجوکیشن اینڈ بورڈنگ اکیڈمی کا دورہ

اشتہارات

چترال(چ،پ) چترال سے تعلق رکھنے والی معروف امریکی کاروباری شخصیت روزیمان شاہ نے اپنی اہلیہ نگہت اکبر شاہ کے ہمراہ "حمیدہ ایجوکیشن اینڈ بورڈنگ اکیڈمی” کا تفصیلی دورہ کیا۔اس موقع پر چترال نیچرل فارمز کے چیف ایگزیکٹو آفیسر (CEO) محمد شعیب بھی ان کے ہمراہ موجود تھے۔

اکیڈمی پہنچنے پر انتظامیہ کی جانب سے معزز مہمانوں کا پرتپاک استقبال کیا گیا۔ روزیمان شاہ اور ان کی اہلیہ نے ادارے کے مختلف حصوں بشمول کلاس رومز، ہاسٹل، اور ڈائننگ ہال کا تفصیلی دورہ کیا۔

انہوں نے بچوں کو فراہم کی جانے والی معیاری تعلیم، نظم و ضبط اور رہائشی سہولیات کا باریک بینی سے جائزہ لیا اور ادارے کے مجموعی ماحول میں گہری دلچسپی کا اظہار کیا۔

اس دورے کا سب سے خوبصورت لمحہ وہ تھا جب روزیمان شاہ اور نگہت اکبر شاہ نے اکیڈمی میں زیرِ تعلیم یتیم اور مستحق بچوں کے ساتھ خصوصی وقت گزارا۔ انہوں نے انتہائی شفقت اور پیار سے بچوں کے ساتھ گفتگو کی، ان کی تعلیمی سرگرمیوں کے بارے میں پوچھا اور ان کے ساتھ یادگار تصاویر بھی بنوائیں۔ مہمانوں کی شفقت پا کر بچوں کے چہروں پر خوشی دیدنی تھی۔

اس موقع پر بات چیت کرتے ہوئے روزیمان شاہ نے حمیدہ ایجوکیشن اینڈ بورڈنگ اکیڈمی کی انتظامیہ کی بے لوث خدمات اور انتھک کاوشوں کو شاندار الفاظ میں سراہا۔

انہوں نے کہا کہ بے سہارا اور یتیم بچوں کو محض تعلیم ہی نہیں بلکہ گھر جیسا محفوظ اور پیار بھرا ماحول فراہم کرنا ایک عظیم کار خیر اور صدقہ جاریہ ہے۔

انہوں نے کہا کہ اکیڈمی کی انتظامیہ چترال کے مستقبل کو سنوارنے کے لیے جو شاندار کردار ادا کر رہی ہے وہ انتہائی قابل ستائش ہے۔

ان کی اہلیہ نگہت اکبر شاہ نے بھی بچوں کی بہترین تربیت اور صفائی کے اعلیٰ انتظامات پر انتظامیہ کو مبارکباد پیش کی۔

اس موقع پر چترال نیچرل فارمز کے سی ای او محمد شعیب نے بھی ادارے کے فلاحی و تعلیمی کاموں کی بھرپور تعریف کی۔ انہوں نے کہا کہ چترال کی پائیدار ترقی اور خوشحالی کے لیے ایسے اداروں کا قیام ناگزیر ہے جو معاشرے کے پسماندہ اور مستحق طبقے کو برابری کے مواقع فراہم کر رہے ہیں۔

دورے کے اختتام پر حمیدہ ایجوکیشن اینڈ بورڈنگ اکیڈمی کی انتظامیہ نے معزز مہمانوں کا تہہ دل سے شکریہ ادا کیا اور اس عزم کا اعادہ کیا کہ مخیر اور دردِ دل رکھنے والی شخصیات کی سرپرستی اور حوصلہ افزائی سے وہ معاشرے کے نونہالوں کی تعمیر و ترقی کا یہ مشن مزید جانفشانی سے جاری رکھیں گے۔