تحصیل تورکہو/موڑکہو کی بجلی سپلائی پیسکو کے حوالے کرنے کے اقدام کو مسترد کرتے ہیں، عمائدین کی پریس کانفرسن

اشتہارات

پشاور(چ،پ) تورکھو اور موڑکھو کے عوام نے حکومت کی جانب سے ان علاقوں کو پیسکو (PESCO) کے حوالے کرنے کے فیصلے کو ناانصافی قرار دیتے ہوئے مسترد کر دیا اور شدید احتجاج کا اعلان کیا ہے۔

پشاور پریس کلب میں پریس کانفرنس سے خطاب کرتے ہوئے عمیر خلیل اللہ، مولانا جاوید حسین، پیر مختار، طاہر الدین شادان، شمس النبی معاویہ، قاری نور مراد، غلام مرتضی، اعجاز رحمن اور عظیم سرور ساحل سمیت دیگر رہنماؤں نے شرکت نے کہا کہ پیڈو (PEDO) ایک صوبائی ادارہ ہے جو ہائیڈرو پاور کے ذریعے سستی بجلی فراہم کرتا ہے، جبکہ پیسکو ایک وفاقی ادارہ ہے جس کی بجلی مہنگی اور اضافی ٹیکسوں سے بھری ہوتی ہے۔ انہوں نے کہا کہ تورکھو اور موڑکھو جیسے پسماندہ علاقوں کے عوام مہنگے نرخوں کو برداشت نہیں کر سکتے، اس لیے یہ فیصلہ فوری واپس لیا جائے۔

پریس کانفرنس میں بونی بزند روڈ اور موڑکھو روڈ کی عدم تکمیل پر بھی افسوسناک کا اظہار کرتے ہوئے اسے حکومت کی نااہلی قرار دیا گیا۔

عمائدین نے الزام لگایا کہ محکمہ سی اینڈ ڈبلیو اور اس کے افسران نے کروڑوں روپے ایڈوانس وصول کر کے کرپشن کی، مگر کام تاحال مکمل نہیں ہوا۔

انہوں نے حکومت سے مطالبہ کیا کہ کرپٹ عناصر کے خلاف کارروائی کی جائے اور ان منصوبوں کو جلد از جلد مکمل کیا جائے۔

عمائدین  نے واضح کیا کہ اگر تورکھو اور موڑکھو کو پیسکو کے حوالے کرنے کا فیصلہ واپس نہ لیا گیا اور ترقیاتی منصوبے مکمل نہ کیے گئے تو عوام بھرپور احتجاج کریں گے، جس کی تمام تر ذمہ داری حکومت پر عائد ہوگی۔

انہوں نے خبردار کیا کہ آئندہ انتخابات میں عوام ان نمائندوں کا محاسبہ کریں گے جو ان کے مسائل حل کرنے میں ناکام رہے۔