سیکورٹی فورسز کی کاروائیاں، تیس دہشت گردوں کو ہلاک کردیا، ضلع خیبر میں فتنہ الخوارج کا اہم کمانڈر مار دیا گیا

اشتہارات

راولپنڈی(چ،پ)سیکیورٹی فورسز نے خیبرپختونخوا میں تین علیحدہ علیحدہ کارروائیوں میں 30 خوارج کو ہلاک کردیا۔خیبر قبائلی ضلع خیبر کے علاقہ باغ میں سیکورٹی فورسز نے ایک کامیاب آپریشن کے دوران فتنہ الخوارج کے اہم کمانڈر عزیز الرحمن عرف قاری اسماعیل اور انکے ساتھی مخلص کو جہنم واصل کر دیا جبکہ اس واقعے میں دو خوارج زخمی ہو گئے۔
سیکورٹی فورسز نے خوارج سے اسلحہ اور گولہ بارود بھی برآمد کر لیا۔ ہلاک شدہ دہشت گردوں کے بارے میں معلوم ہوا ہے کہ وہ علاقے میں دہشت گردی کی سرگرمیوں میں ملوث تھے ۔
پاک فوج کے شعبہ تعلقات عامہ (آئی ایس پی آر) کی جانب سے جاری اعلامیے کے مطابق 24 اور 25 جنوری کو خیبر پختونخوا کے مختلف علاقوں میں تین الگ الگ کارروائیوں کے دوران سیکیورٹی فورسز نے 30 خوارج کو ہلاک کر دیا۔
ضلع لکی مروت میں خوارج کی موجودگی کی اطلاع پر انٹیلیجنس کی بنیاد پر ایک آپریشن کیا گیا۔ جس کے دوران سیکیورٹی فورسز نے خوارج کے ٹھکانوں کو مؤثر انداز میں نشانہ بنایا اور 18 خوارج کو ہلاک جبکہ 6 کو زخمی حالت میں گرفتار کرلیا۔
دوسری انٹیلی جنس کارروائی ضلع کرک میں کی گئی جہاں فائرنگ کے تبادلے میں 8 خوارج ہلاک ہوئے اس کے علاوہ تیسری جھڑپ خیبر ضلع کے عمومی علاقے باغ میں ہوئی، جہاں سیکیورٹی فورسز نے 4 خوارج کو ہلاک کر دیا۔
آئی ایس پی آر کے مطابق ہلاک ہونے والے خوارج کے قبضے سے اسلحہ اور گولہ بارود بھی برآمد کیا گیا جبکہ مارے جانے والے دہشت گرد معصوم شہریوں کے قتل میں ملوث تھے۔
اعلامیے کے مطابق علاقے میں کسی بھی باقی ماندہ خوارج کو ختم کرنے کے لیے کلیرنس آپریشن جاری ہیں، پاک فوج دہشت گردی کے ناسور کو ملک سے مکمل طور پر ختم کرنے کے لیے پرعزم ہے۔