ڈپٹی اسپیکر کے پی اسمبلی ثریا بی بی کی یقین دہانی پر ریشن میں جاری دھرنا ختم کردیا گیا

اشتہارات

چترال(چ،پ)ڈپٹی اسپیکر خیبر پختونخوا اسمبلی ثریا بی بی کی یقین دہانی پر اپر چترال کے گاوں ریشن میں گذشتہ کئی ہفتوں سے جاری دھرنا ختم کردیا گیا ۔ تفصیلات کے مطابق گذشتہ روز ڈپٹی سپیکر ثریا بی بی اور پاور کمیٹی ریشن کے درمیان کامیاب مذاکرات کے بعد پاور کمیٹی ریشن نے احتجاجی بھوک ہڑتالی کیمپ ختم کرنے کا اعلان کر دیا۔
اس سلسلے میں گذشتہ روز مذاکراتی نشست ریشن میں منعقد ہوئی جس میں ڈپٹی اسپیکر صوبائی اسمبلی کے علاوہ ایڈیشنل ڈپٹی کمشنر اپر چترال معظم خان اور ڈائریکٹر پیڈو جواد نے شرکت کی جبکہ پاور کمیٹی ریشن کی طرف سے تحریک کے صدر سید سردار حسین شاہ، سابق پرنسپل صاحب الرحمن ،وی سی چیئرمین اشفاق احمد اور حیات الدین کے علاوہ پاؤر کمیٹی کے اکثر ممبران موجود تھے ۔
پاور کمیٹی کی نمائندگی کرتے ہوئےصاحب الرحمن نے بجلی سے متعلق مسئلے کو حل کرنے کے حوالے سے ڈپٹی سپیکر ثریا بی بی کی کوششوں کی تعریف کی اور انہیں خراج تحسین پیش کیا اور ریشن کے عوام کی طرف سے ان کا شکریہ ادا کیا ۔سید سردار حسین نے کہاہم پشاور سے مطمئن ہو کر لوٹے ہیں ۔ ہمیں ڈپٹی اسپیکر پر پورا پورا اعتماد ہے۔ ہم پر امید ہیں انشاء اللہ ہمارا مسئلہ ڈپٹی اسپیکر کی کوششوں کے نتیجے میں جلد حل ہو جائے گا۔
مذاکراتی اجلاس سے خطاب کرتے ہوئے ڈپٹی سپیکر ثریا بی بی نے کہا کہ ریشن کے عوام اپنے جائز مطالبات کے حصول کے خاطر دو مہینے سے احتجاجی میں بیٹھے ہیں، میں ان کو سلام پیش کرتی ہوں۔انہوں نے کہا کہ میں آج یہاں پر آپکو خوشخبری سنانے اور مبارکباد دینے آئی ہوں کہ آپکا مسئلہ نوے فیصد حل ہو چکا ہے اور اب مزید احتجاج کی ضرورت باقی نہیں رہی۔ انہوں نے کہا کہ وزیر اعلیٰ خیبر پختونخوا کی ہدایت پر انشاء اللہ جلد مکمل طور پر حل ہو جائے گا۔
ڈپٹی اسپیکر کے ساتھ مذاکراتی نشست نے بعد پاور کمیٹی ریشن نے ان پر اعتماد کا اظہار کرتے ہوئے دو مہینے سے جاری احتجاجی دھرنا ختم کرنے کا اعلان کردیا۔