75

الخدمت فاؤنڈیشن نے چترال میں جدید سہولیات سے آراستہ صحت مرکز قائم کرلیا، عنقریب افتتاح کیا جائے گا

چترال(بشیرحسین آزاد)الخدمت فاؤنڈیشن نے چترال میں ہیلتھ کئیر کے شعبے میں ایک اورسنگ میل عبور کرتے ہوئے جدید ترین سہولیات سے آراستہ زچہ وبچہ مرکز اور سرجیکل یونٹ قائم کر لیا ہے جس کا افتتاح عنقریب ہوگا جبکہ ضلعے میں سب سے پہلی مرتبہ سی ٹی اسکین اور ایم آر آئی کی سہولیات بھی اس کے ڈائیگناسٹک لیبارٹری میں فراہم کئے جارہے ہیں جس کے بعد مریضوں کو پشاور جانے کی ضرورت نہیں رہے گی۔ الخدمت فاؤنڈیشن کے ڈائیگناسٹک سنٹر اور زچہ وبچہ ہسپتال کے دورہ کرنے والے چترال پریس کلب سے تعلق رکھنے والے صحافیوں کو تفصیلات بتاتے ہوئے الخدمت فاونڈیشن لوئر چترال کے صدر نوید احمد بیگ، ایڈمنسٹریٹر عبدالحق اور ہیلتھ کوآرڈنیٹر اسعد کامران نے کہاکہ چترال میں الخدمت فاؤنڈیشن کے زیر اہتمام الخدمت ڈاگناسٹک سینٹر میں چلنے والے تشخیصی لیبارٹری معیار اور بہترین خدمت کی نشانی ہے جہاں پر لوئر اور اپر چترال کے اضلاع کے لاکھوں عوام گزشتہ دس سالوں سے مستفید ہورہے ہیں، یہاں پر رعایتی نرخ رائج ہیں۔انہوں نے کہاکہ سی ٹی اسکین اور ایم آر آئی کی سہولیات کی فراہمی کی ضرورت اس علاقے میں شدت سے محسوس کی جارہی تھیں جوکہ یہاں بہت جلد ہی دستیاب ہوں گے۔ انہوں نے کہا کہ الخدمت زچہ وبچہ مرکز اور سرجیکل یونٹ کا افتتاح 10اپریل کو کیا جارہا ہے جن میں جد ید خطوط پر استوار سہولیات کی فراہمی شروع ہوگی۔ انہوں نے کہاکہ الخدمت فاونڈیشن کی ایمبولنس سروس بھی بہت ہی فعال رہا ہے جس پر عوام الناس نے ہمیشہ سے اعتماد کا اظہارکرتے ہوئے مریضوں کی منتقلی میں اسی کو ترجیح دی۔ صدر نوید احمد بیگ سے مزید کہاکہ گزشتہ سال کووڈ19کا عالمی وبا پھیلنے کے بعد الخدمت فاونڈیشن نے ایمبولنس سمیت ہیلتھ کئیر کی دوسری سہولیات ضلعی انتظامیہ کے ڈسپوزل میں دے دیا تھا جس سے ہزاروں افراد مستفید ہوگئے۔