مسلسل بارشوں سے چترال میں نظام زندگی متاثر، سڑکیں بند

اشتہارات

چترال(بشیر حسین آزاد)چترال کے طول وعرض میں گزشتہ تین دنوں سے مسلسل بارشوں کے نتیجے میں تمام شاہراہوں میں ملبہ گرنے اور پھر ان کی صفائی کا عمل جاری ہے۔ چترال پشاور روڈ کو لوئرچترال کی ضلعی انتظامیہ نے این ایچ اے، سی اینڈ ڈبلیو اور ٹی ایم اے کی مشینریز کی مدد سے کھلوادیا ہے جس کے بعد ٹریفک بحال ہوئی تاہم اتوار کی رات مزید بارشوں کے نیتجے میں متعدد مقامات پر چترال پشاور روڈ پھر بند ہوگئی جسکی وجہ سے مسافرمختلف مقامات پر محصور ہو گئے۔دروش کے قریب میرکھنی کے مقام پر بھاری پہاڑی تودہ گرنے سے ٹریفک طویل دورانئے تک معطل رہی۔ دروش کے کڑدام گول اور عشریت کے کوچھان گول کے مقاما ت پر مشینری اسٹینڈ بائی رکھے گئے ہیں جوکہ موٹر گاڑیوں کو پار کرنے میں مدد فراہم کرتے ہیں۔ ڈی سی لویر چترال محمد عمران خان نے میڈیا کوبتایاکہ ضلع کے اندر تمام متاثرہ سڑکوں میں ٹریفک کو دوبارہ چالو کرنے کے لئے این ایچ اے، سی اینڈ ڈبلیو اور ٹی ایم اے کی مشینریاں لگائی گئی ہیں اوروہاں پر ضلعی انتظامیہ کے افسران بھی موجود رہ کر کام کی نگرانی کررہے ہیں۔ انہوں نے کہاکہ بمبوریت روڈاور گرم چشمہ روڈ کی بحالی کے لئے کام زوروشور سے جاری ہے۔
بارشوں کے نتیجے میں مختلف علاقوں سے کچے مکانات کے گرنے کاسلسلہ جاری ہے۔ چترال ٹاون کے گاؤں بکامک میں اتوار کی صبح ایک گھر کے منہدم ہونے سے چار افراد زخمی ہوگئے جنہیں ڈسٹرکٹ ہیڈ کوارٹرز ہسپتال میں داخل کئے گئے ہیں۔ اسی طرح ا ٓج اتوارکے روز لویر چترال کے گاؤں کالکٹاک، ڈاپ خیر آباد، کاری، برغوزی اور بکرآباد میں جبکہ اپر چترال کے نوڑاور کوشٹ میں بھی ایک ایک گھروں کے منہدم ہونے کی خبریں موصول ہوئی ہیں لیکن کوئی جانی نقصان نہیں ہوا۔
مسلسل بارش کی وجہ سے سردی کی شدت میں اضافہ دیکھنے میں آئی ہے جبکہ گرم چشمہ اوراپر چترال کے اکثر علاقوں میں برفباری کی خبریں موصول ہوئی ہیں۔ اپر چترال کے گاؤں اوژنو، کھوت، ریچ، مڑپ اور تریچ کی وادیوں میں 9انچ سے لے کر ڈیڑھ فٹ تک برف پڑگئی ہے۔
سڑکوں کی بندش کی وجہ سے اپر چترال اور لوٹ کوہ کے مختلف دیہات میں عید کی چھٹیوں پرآئے ہوئے طالب علموں کے علاوہ سرکاری، غیر سرکاری اور پرائیویٹ سیکٹر سے تعلق رکھنے والے سڑکوں کی خرابی کی وجہ سے اپنے اپنے گاؤں میں پھس کر رہ گئے ہیں۔

#chitralpost