180

غیر سرکاری ادارے IPSFکی طرف سے نادار اور بے سہارا افراد کیلئے شیلٹر ہوم قائم، ڈپٹی کمشنر نوید احمد نے افتتاح کیا

چترال(بشیر حسین آزاد)زرگراندہ چترال میں Indigenous People Survival Foundation(IPSF) کی طرف سے بغیر چھت والے ناداربے سہارا افراد کیلئے شیلٹرہوم قائم کر لیا گیا جس میں بغیر بے گھر افراد کیلئے شیلٹر کے ساتھ مفت کھانے کا انتظام بھی کیا گیا ہے۔شیلٹر ہوم میں پندرہ افراد کی رہائش کی گنجائش رکھی گئی ہے۔ ڈپٹی کمشنر چترال چترال نوید احمد خان نے گذشتہ روز اس شیلٹر ہوم کا افتتاح کیا۔ اس موقع پر انکے ہمراہ اسسٹنٹ کمشنر چترال عبدالولی خان،پرنسپل نیو سٹی کالج زرگراندہ چترال مسرور علی شاہ، صدر تجار یونین شبیر احمداور دیگر موجود تھے۔ڈی سی چترال نے مفت لنگر اور شیلٹر ہوم کے قیام پر چیف ایگزیکٹیو اور اُن کی ٹیم کی تعریف کرتے ہوئے کہا کہ نیکی اور رفاہی کاموں میں سب سے اچھا کام مسکینوں اور غریبوں کو کھانا کھلانا اور اُنہیں رہائش فراہم کرنا ہے۔ ادارے کی جانب سے چترال میں غریب و نادار لوگوں کیلئے مفت خوراک اور رہائش کی فراہمی ایک بہترین کوشش ہے ا ور اس طرح کے کارخیر میں مخیر حضرات کو بڑھ چڑھ کر حصہ لینا چاہیئے۔ اُنہوں نے ضلعی انتظامیہ کی طرف سے ادارے کے ساتھ ہرممکن تعاون کی یقین دہانی کی۔چترال لنگر کے انچارج صباء الرحمن نے اس کارخیر میں حصہ لینے اور حوصلہ افزائی کرنے کے لئے شدید برف باری میں شیلٹر ہوم کا افتتاح میں حصہ لینے پر ڈپٹی کمشنر چترال نوید احمد اور اے سی چترال عبدالولی خان سمیت دیگر مہمانوں کا شکریہ اداکیا۔ اُنہوں نے کہا 17 سالوں سے چترال میں قائم چترال لنگر سے چترال کے ہسپتالوں میں روزانہ مریضوں اور اُن کے تیمارداروں کے ساتھ ساتھ دیگر نادار افرادمیں کھانا تقسیم کیا جارہا ہے جس سے نادار، کم وسائل والے لوگ استفادہ کرتے ہیں اور ابتک لاکھوں افراد مفت کھانا حاصل کر چکے ہیں اور یہ سلسلہ جاری ہے۔ اُنہوں نے کہا کہ ہماری خواہش تھی کہ چترال شہر میں بغیر چھت والے نادار بے سہارا افراد کیلئے شیلٹرہوم تعمیر کیا جائے جو کہ اللہ کے فضل وکرم سے آج پورا ہوا۔