ڈی پی او لوئر چترال اکرام اللہ خان نے دروش کا دورہ کیا،عمائدین سے ملاقات، تھانے کا معائنہ

اشتہارات

چترال (نامہ نگار)ڈسٹرکٹ پولیس آفیسر لوئر چترال اکرام اللہ خان(PSP) نے گذشتہ روز دروش کا دورہ کیا اور ایس ڈی پی او آفس میں دروش کے عمائدین کیساتھ ملاقات کی۔ اس موقع پرمعتبرات علاقہ،علمائے کرام تجاریونین کے نمائندوں سے خطاب کرتے ڈی پی او لوئرچترال نے کہاکہ معاشرتی جرائم کی روک تھام میں پولیس اور عوام کا ایک دوسرے کے ساتھ تعاؤن انتہائی ضروری ہیں۔آپ لوگوں کے تعاون سے علاقہ دروش میں جرائم کی روک تھام اور منشیات فروشان کے خلاف کاروائیوں میں پولیس کو کامیابی حاصل ہوگی۔انہوں نے عمائدین سے اپیل کی کہ پولیس کے ساتھ تعاؤن کریں اور اپنے علاقے کو جرائم اور منشیات سے پاک کرنے میں اپنا کردار ادا کریں، اپنے علاقوں میں منشیات فروشی کے دھندے میں ملوث افراد کی معلومات پولیس کو دیں اور ان کے خلاف گواہی بھی دیں تاکہ معزز عدالت سے ان کو سخت سے سخت سزائیں ہوں۔ موجود حالات میں اپنے علاقوں میں غیر مقامی اور مشکوک افراد کی اطلاع بروقت پولیس کو دیں۔ اس موقع پر شرکاء نے ڈی۔پی۔او لوئر چترال کے زیر نگرانی منشیات فروشوں کے خلاف جاری کارروائیوں پر لوئر چترال پولیس کی کارکردگی کو سراہا اور علاقے میں امن وامان،معاشرتی جرائم کی روک تھام اور منشیات کے خلاف مہم بھی پولیس کا بھرپور ساتھ دینے کی یقین دہانی کی۔پروگرام میں تجار یونین کے نمائندوں کو مخاطب کرتے ہوئے انہوں نے کہا کہ لوئر شہر کی سیفٹی اور بازاروں میں چوری کے واردتوں کی روک تھام کے خاطر لوئر چترال پولیس کمانڈ اینڈ کنٹرول سسٹم سنٹر کا قیام عمل میں لایا گیا جہاں پر پولیس اہلکار مختلف جگہوں میں نصب شدہ سی سی ٹی وی کیمروں کی مدد سے 24 گھنٹے مانیٹر کررہے ہیں کاروباری حضرات اپنے دوکانوں میں نصب شدہ سی سی ٹی وی کیمروں کو پولیس کمانڈ اینڈ کنٹرول سسٹم سے لنک کرکے بازار کی سیکورٹی میں پولیس کے ساتھ تعاون کرسکتے ہیں۔
بعد ازاں ڈی پی او نے تھانہ دروش کا وزٹ کرکے تھانے کا ریکارڈ، حوالات اور بلڈنگ کا معائنہ کیا۔انہوں نے فرنٹ ڈسک کا وزٹ کرکے تمام زیر تفتیش مقدمات کا جائزہ لیا اور جلد از جلد میرٹ پر یکسو کرنے کے احکامات جاری کئے۔انہوں نے کہا کہ تھانے آنے والے سائلین کے ساتھ خوش اخلاقی سے پیش آئیں اور انکے مسائل فوری حل کریں۔عوام کو انصاف اور ریلیف کی فراہمی پولیس کا فریضہ ہے۔موجودہ حالات میں سیکورٹی انتظامات مزید سخت کرنے کی ہدایات دی۔