108

چترال بونی روڈ کی مرمت میں مزید تاخیر برداشت نہیں،احتجاجی تحریک شروع کرینگے/عمائدین کوہ

چترال(چ،پ)کوہ یونین کونسل کے عمائدین نے ایڈیشنل ڈپٹی کمشنر چترال حیات شاہ پر واضح کردیا ہے کہ اگر ان کے علاقے سے گزرنے والی بونی روڈ کی ضروری مرمت میں مزید غفلت برتاگیا تو وہ 5اپریل سے احتجاج کے طور پر اس مصروف سڑک کو ہر قسم کی ٹریفک کے لئے بند کرنے پر مجبور ہوں گے۔ گذشتہ روز جے یو آئی کے امیر اور سابق ایم پی اے مولانا عبدالرحمن، امیر جماعت اسلامی چترال اخونذادہ رحمت اللہ، عبدالقیوم شاہ، سیف الدین، شریف حسین، حاجی شیر حکیم، غبدالغفار لال، جلال الدین اور دوسروں پر مشتمل ایک وفد نے ضلعی انتظامیہ سے ملاقات میں اس بات پر افسوس کا اظہار کیاکہ این اے ایچ کی تحویل میں آنے کے بعد سے اس سڑک کی حالت انتہائی ناگفتہ بہہ ہوگئی ہے اور یہ سڑک سے زیادہ کھنڈر کامنظر پیش کررہی ہے جس سے مسافر سخت اذیت میں مبتلا ہیں اور بار بار توجہ دلانے کے باوجود کوئی کاروائی نہیں ہوئی۔ اے ڈی سی نے عمائدین کی موجودگی میں این ایچ اے کے ڈائریکٹر سے ٹیلی فون پر گفتگو کرتے ہوئے مسئلے سے باخبر کیا جس پر انہوں نے ٹھیکہ دار کو ہدایت کرنے کی یقین دہانی کرائی۔ عمائیدین نے کہاکہ ماضی میں بھی انہیں اس طرح ٹرخایا گیا اور اس بار بھی اگر یہی کچھ ہوا تو وہ سخت احتجاج کریں گے۔